കമ്യൂണിസ്റ്റ് നേതാവിന്റെ മകൾക്ക് ‘വീട്ടുതടങ്കൽ’; ‘കമ്യൂണിസമെല്ലാം വീടിന് പുറത്ത്, പോയി ചാക്’ – യുവതിയുടെ വെളിപ്പെടുത്തൽ
കാസർഗോഡ്: ഇതരമതസ്ഥനായ യുവാവിനെ വിവാഹം കഴിക്കാൻ തീരുമാനിച്ച സി.പി.എം. നേതാവിന്റെ മകൾ വീട്ടുതടങ്കലിലാണെന്നും ക്രൂരമായ ശാരീരിക-മാനസിക പീഡനം അനുഭവിക്കുന്നുവെന്നും പരാതി. കാസർഗോഡ് ഉദുമ ഏരിയ കമ്മിറ്റി അംഗം പി.വി. ഭാസ്കരന്റെ മകൾ സംഗീതയാണ് തനിക്കുണ്ടായ ദുരനുഭവങ്ങൾ വെളിപ്പെടുത്തിക്കൊണ്ട് വീഡിയോ സന്ദേശവുമായി രംഗത്തെത്തിയിരിക്കുന്നത്.
അരയ്ക്ക് താഴെ ചലനശേഷി നഷ്ടപ്പെട്ട യുവതി ഏകദേശം അഞ്ചുമാസത്തോളമായി വീട്ടുതടങ്കലിലാണെന്നും കൃത്യമായ ചികിത്സ പോലും നിഷേധിക്കപ്പെടുകയാണെന്നും പറയുന്നു. ഒരു വാഹനാപകടത്തെത്തുടർന്നാണ് സംഗീതയ്ക്ക് ചലനശേഷി നഷ്ടമായത്.
“കമ്യൂണിസമൊക്കെ വീടിന് പുറത്ത്”
വീട്ടുകാർ തനിക്കെതിരെ തിരിഞ്ഞത് ഒരു ഇതരമതസ്ഥനായ യുവാവിനെ വിവാഹം കഴിക്കാനുള്ള ആഗ്രഹം അറിയിച്ചതോടെയാണെന്ന് സംഗീത വെളിപ്പെടുത്തി. “ഒരു മകളോട് പറയാനോ ചെയ്യാനോ പാടില്ലാത്ത കാര്യങ്ങളാണ് എൻ്റെ അച്ഛൻ ചെയ്യുന്നത്. കമ്യൂണിസമെല്ലാം വീടിന് പുറത്താണെന്നും, വീടിനകത്ത് അതൊന്നും നടക്കില്ലെന്നും പറഞ്ഞ് അച്ഛൻ എൻ്റെ മുഖത്ത് നോക്കി സംസാരിച്ചു,” സംഗീത പറയുന്നു.
“പോയി ചാകാൻ” പിതാവ് പലതവണ ആവശ്യപ്പെട്ടതായും, “നീ ഇനി നടക്കാനും പോകുന്നില്ല. അരയ്ക്ക് താഴെ തളർന്ന നീ ഇതുപോലെ ഇവിടെ കിടന്ന് പുഴുത്തോ” എന്ന് ഭീഷണിപ്പെടുത്തിയതായും യുവതിയുടെ വെളിപ്പെടുത്തലിലുണ്ട്. താൻ പറയുന്നത് അനുസരിച്ചില്ലെങ്കിൽ കൊന്നുകളയാനും കേസിൽ നിന്ന് ഊരിപ്പോരാനും തനിക്കറിയാമെന്ന് പിതാവ് പറഞ്ഞതായും യുവതി ആരോപിച്ചു.
ചികിത്സ മുടങ്ങി, പണം കൈക്കലാക്കി
വിവാഹമോചന സെറ്റിൽമെൻ്റ് തുക മുഴുവൻ പിതാവും സഹോദരനും ചേർന്ന് കൈക്കലാക്കിയതായും അതിനുശേഷം ചികിത്സ പോലും കൃത്യമായി ലഭിക്കുന്നില്ലെന്നും സംഗീത പറയുന്നു. അരയ്ക്ക് താഴെ തളർന്നതിനെ തുടർന്ന് നടത്തിയിരുന്ന ട്രീറ്റ്മെൻ്റ് എല്ലാം നിർത്തിവച്ചതായും യുവതി പരാതിപ്പെടുന്നു.
ചികിത്സയ്ക്കായി എത്തിയ നാഡി വൈദ്യനുമായി സംഗീത അടുപ്പത്തിലാവുകയും ഇദ്ദേഹത്തെ വിവാഹം കഴിക്കാൻ താൽപര്യം അറിയിക്കുകയും ചെയ്തതോടെയാണ് പീഡനം അതിരുകടന്നത്. തുടർന്ന് ചികിത്സ നിർത്തി യുവതിയെ വീട്ടിൽ പൂട്ടിയിടുകയായിരുന്നു.
പോലീസ് നടപടി ഉണ്ടായില്ലെന്ന് ആരോപണം
വീട്ടുതടങ്കലിൽ നിന്ന് മോചനം ആവശ്യപ്പെട്ട് സംഗീത സുഹൃത്തിൻ്റെ സഹായത്തോടെ നേരത്തെ ഹേബിയസ് കോർപ്പസ് ഹർജി ഫയൽ ചെയ്തിരുന്നു. എന്നാൽ മാതാപിതാക്കൾക്കൊപ്പമാണ് കഴിയുന്നതെന്ന പോലീസ് റിപ്പോർട്ടിനെ തുടർന്ന് കോടതിയിൽ ഹർജി നിലനിന്നില്ല. പിതാവിൻ്റെ രാഷ്ട്രീയ സ്വാധീനം കാരണം പ്രാദേശിക പോലീസിൽ നിന്ന് നീതി ലഭിക്കില്ലെന്ന വിശ്വാസമുള്ളതിനാലാണ് കളക്ടർക്കും എസ്.പി.ക്കും പരാതി നൽകിയതെന്നും സംഗീത പറയുന്നു.
രഹസ്യമായി സൂക്ഷിച്ച ഫോണിൽ സ്വയം വീഡിയോ ചിത്രീകരിച്ചാണ് യുവതി സഹായം അഭ്യർത്ഥിച്ചിരിക്കുന്നത്. സംഭവത്തിൽ കാസർഗോഡ് പോലീസ് ഇതുവരെ ഔദ്യോഗികമായി നടപടികളൊന്നും സ്വീകരിച്ചിട്ടില്ല. എത്രയും പെട്ടെന്ന് വീട്ടുതടങ്കലിൽ നിന്ന് മോചനം വേണമെന്നാണ് സംഗീതയുടെ ആവശ്യം.
