തിരുവനന്തപുരം: നഗരത്തിലെ ഒരു പ്രമുഖ ഹോട്ടലിൽ നടന്ന ഡി.ജെ. പാർട്ടിക്കിടെ ചേരിതിരിഞ്ഞ് കൂട്ടത്തല്ല്. തിരുവനന്തപുരം പാളയത്തുള്ള സൗത്ത് പാർക്ക് ഹോട്ടലിലാണ് സംഭവം നടന്നത്. അടിപിടിയിൽ ലഹരി കേസ് പ്രതികളും കൊലപാതക കേസ് പ്രതികളും പങ്കെടുത്തതായി പോലീസ് സ്ഥിരീകരിച്ചു.
പാർട്ടിക്കിടെ രണ്ടു സംഘങ്ങളായി തിരിഞ്ഞാണ് ഇവർ ഏറ്റുമുട്ടിയത്. ഹോട്ടലിനുള്ളിൽ ആരംഭിച്ച സംഘർഷം പിന്നീട് റോഡിലേക്കും വ്യാപിച്ചു. പൊതുനിരത്തിലെ ഈ കൂട്ടത്തല്ലാണ് പോലീസ് സ്വമേധയാ കേസെടുക്കാൻ കാരണം.
ഹോട്ടലിന് പോലീസ് നോട്ടീസ്
സംഭവത്തിൽ ഹോട്ടൽ അധികൃതർക്ക് പോലീസ് നോട്ടീസ് നൽകി. ഡി.ജെ. പാർട്ടി നടന്ന ഹാളിൽ സി.സി.ടി.വി. ക്യാമറകൾ ഉണ്ടായിരുന്നില്ലെന്നും പരിപാടി സംഘടിപ്പിച്ചവരുടെ വിവരങ്ങൾ പോലീസിന് കൈമാറിയില്ലെന്നും നോട്ടീസിൽ പറയുന്നു. ഇത്തരം സംഭവങ്ങൾ ആവർത്തിച്ചാൽ കർശന നടപടി സ്വീകരിക്കുമെന്ന് പോലീസ് മുന്നറിയിപ്പ് നൽകിയിട്ടുണ്ട്.
പരാതി പിൻവലിച്ചു, കേസ് സ്വമേധയാ
അടിപിടിയിൽ പരിക്കേറ്റ ഒരാൾ ആദ്യം പോലീസിൽ പരാതി നൽകിയിരുന്നെങ്കിലും പിന്നീട് പിൻവലിച്ചു. നിലവിൽ ആരും ഔദ്യോഗികമായി പരാതി നൽകിയിട്ടില്ലെന്ന് പോലീസ് അറിയിച്ചു. എന്നാൽ, റോഡിൽ നടന്ന സംഘർഷത്തിൻ്റെ പശ്ചാത്തലത്തിൽ പോലീസ് സ്വമേധയാ കേസെടുത്ത് അന്വേഷണം ആരംഭിച്ചു. പരിപാടിയിൽ പങ്കെടുത്ത ക്രിമിനൽ പശ്ചാത്തലമുള്ള വ്യക്തികളെക്കുറിച്ചും പോലീസ് വിവരങ്ങൾ ശേഖരിക്കുന്നുണ്ട്.
